وروستي خبرونه

2020 May 11

ZhwandoonMay 11, 2020
939.jpg

3410

سپورت کول د بدن لپاره ډیر ګټور دی، نو له همدي امله ډاکټران تل توصیه کوي تر څو خلک په ورځني ډول سپورت وکړي. د څېړنو له مخې سپورت د بدن د روغتیا تر څنګ د انسان د عمر د ډیریدو سبب هم کیږي، خو آیا کله مو هم فکر کړی چې ورزش په کوم وخت کې ډېر ګټور دی؟

معمولاً ورزش په هر وخت کې د انسان د بدن لپاره ګټور دی، خو د ورځي په جریان کې په ځیني ساعتونو کې یې بیا تأثیر لا زیات وي. څېړنو ښودلي چې په ورځني ډول د ورزش کولو لپاره د وخت په نظر کې نیول زیات آړین دي.

د څېړنو په اساس د ورزش کولو لپاره تر ټولو غوره وخت د ماسپښین له ۴ بجو بیا د ماښام تر ۷ بجو پورې دی، ځکه په دې وخت کې بدن ښه تقویت شوی وي.

په دغه وخت کې د سپورت کولو په اړه د آلمان د بدني روزني د پوهنتون ډاکټر اینګو فروبوزه وايي په دې وخت کې د انسان د بدن مختلفي برخې په خپل ټول توان سره فعالیت کوي او یا هم د فعالیت لپاره د چمتو والي په حال کې وي، له همدې امله په دې وختونو کې تر ټولو قوي ورزشونه هم انسان ته سپک او آسانه ښکاري.

البته دا په دې معنی نده چې د ورځي په جریان کې په نورو وختونو کې ورزش ګټه نلري، بلکي په دغه وخت کې ورزش کول د بدن لپاره نسبت نورو وختونو ته ډېر ګټور ده.


ZhwandoonMay 11, 2020
938.jpg

1810

ژباړه: رحمت الله محمد

د نړۍ هغه پنځه ښارونه چې زیات میلیاردران په کې ژوند کوي

۱. د چین پلازمینه (پیکین): دا لمړی ځل دی چې د چین پلازمینه پیکین له نیویارک څخه مخکې کیږي، او په دې ښار کې د میلیاردرانو شمیر ۱۰۰ کسانو ته رسیږي. په دې وروستیو کې د چین هېواد د اقتصادي وضعیت د ښه کیدو له امله په دې هیواد کې د میلیاردرانو شمېر زیات شوی دی، او د څېړنو له مخې چې په ټول چین کې ۵۶۸ میلیاردران ژوند کوي.

۲. د امریکا نیویارک ایالت: په دې ځای کې د نړۍ ۹۵ میلیاردران ژوند کوي.

۳. د روسیي پلازمینه (مسکو): په دې ښار کې ۸۰ میلیاردران ژوند کوي، څو کاله وړاندې په مسکو کې د نړۍ په کچه تر ټولو زیات میلیاردران اوسیدل، خو د کارپوهانو په نظر چې په دې ښار کې د ځینو اقتصادي ستونزو لکه: د نفتو د بیو د کموالي او داسي نور… له امله په دې ښار کې د میلیاردرانو شمېر راکم شوی دی.

۴. هانګ کانګ: په دې هېواد کې د نړۍ ۶۴ میلیاردران ژوند کوي. هانګ کانګ ته به مخکې د اسیا د میلیاردرانو مرکز هم ویل کیدل.

۵. د چین شانګهاي ښار: په دې ښار کې ۵۰ میلیاردان ژوند کوي، داسي ویل کیږي چې په دي وروستیو کې په یاد ښار کې د میلیادران شمېر په ډیریدو ده.


ZhwandoonMay 11, 2020
937.jpg

1850

د تازه راپورنو له مخې چې تر دې دمه نړۍ کې د کورونا ویروس له امله له 283 زرو نه ډېرو کسانو خپل ژوند له لاسه ورکړی او له 4 میلیونو نه ډېر کسان پرې اخته دي، چې تر ټولو ډېر بیا امریکا کې دي. د امریکایې رسنیو د راپورونو له مخې چې دغه هېواد کې تر دې دمه له 80 زرو نه ډېرو کسانو خپل ژوند له لاسه ورکړی او له یو میلیون،3 لکو او 67 زرو نه ډېر نور کسان پرې اخته دي، تر امریکا وروسته تر ټولو ډېرې مثبتې پېښې په هسپانیه کې ثبت شوي دغه هېواد کې له 2 لکو 64 زرو نه ډېرې مثبتې پېښې ثبت شويدي،ورپسې برېتانیا، بیا ایټالیا او بیا روسیه هغه هېوادونه دي چې تر ټولو ډېرې مثبتې پېښې لري.


ZhwandoonMay 11, 2020
936.jpg

2790

افغان کرېګټ بورډ څخه په خپره شوي خپر پاڼه کې راغلي، د ملي لوبډلی پر لوبغاړي شفیق الله شفق د فساد پر وړاندې د مبارزې کوډ له اصولو د سرغړونې له امله پر نوموړی د هر ډول کرېګټ نه کول له بندیز سره مخ کړ. خپر پاڼه زیاتوي، چې پر نوموړي دغه سرغړونې د افغانستان غوره لیګ د لومړي پړاو ۲۰۱۸ کال سیالیو کې د لوبو لپاره د جوړ جاړي منلو هوکړې او همدارنګه د بنګلدېش د ۲۰۱۹ کال غوره لیګ سیالیو کې تر سره کړي دي، چې له همدې امله به نوموړی په راتلونکو شپږو کلونو کې د هېڅ ډول کرکټ اجازه ونه لري. خو د کرېګټ چارو یو شمېر څارونکو د کرېګت بورډ له غي پریکړي سره مخلافت ښودلي او ویلي دي چې کرېګټ بورډ ځینو لوبغاړو ته داډول قضې جوړوي او پرځای یې خپل خپلوانو ته زمینه سازي کوي.


ZhwandoonMay 11, 2020
935.jpg

1610

ننګرهار ولایت د رسنیو دفتر ویلي، چې په محبس کې له اوو مشکوکو پېښو له له معایناتو ورسته شپږ یې مثبتې ثابتې شوي. د یاد دفتر په وینا د ننګرهار په محبس کې د کورونا ویروس د مثبتو مواردو له موندل کېدو وروسته والي شاه محمودمیاخېل د عامې روغتیا او محبس مسوولانو ته په دې برخه کې لازمې سپارښتنې کړې دي او د محبس له مسوولینو یې غوښتنه کړې، چې ناروغو بندیانو ته په محبس کې جلا تجرید خونې پرانیستل شوي. وروسته له هغې د ننګرهار په محبس کې د کورونا شپږ مثبتې پېښې ثبتیږي، چې هېواد کې پرکورونا ویرسو د اخته کسانو شمېر ورځ تربلې مخ پر زیاتېدو دی


ZhwandoonMay 11, 2020
934.jpg

1030

بهرنیو چارو چارسمبالي وزیر حنیف اتمر د ایران له بهرنیو چارو له وزیر جواد ظریف سره د غه هېواد کې د افغان مسافرو پر وژل کېدو ټلیفوني خبرې کړي. له یاد وزارت نه په خپره شوې خبرپاڼه کې راغلي، چې دواړو لوریو د مسافرو پر وژل کېدو خواشیني څرګنده کړې، د خبر پاڼې له مخې هرات ته افغان پلاوی رسېدلی، او ایراني پلاوي هم د ایران په مشهد کې خپلې پلټنې پیل کړي، د یاد وزارت په وینا یې هر اړخیزه پلټنو موخه یې د عامیلنو پیدا کول دي. حنیف اتمر هرات ته د افغان پلاوي د رسېدو خبر ورکړی دی.

جواد ظریف ویلي چې ددوی پلاوی به هم ژر په مشهد کې خپلې پلټنې پيل کړي او وروسته به دواړه لوري معلومات سره شریک کړي. همدا راز په یادو خبرو کې ایران د بهرنیو چارو وزیر جواد ظریف ویلي د اړتیا سره سم به د دواړو لوریو ګډ پلاوی هم جوړ شي، چې په هرات او مشهد کې به غونډې ولري. په ورته مهال له ایران سره پر ګډه پوله د ایراني پوځیانو له خوا هریرود سیند ته د لسګونه افغانانو د غورځولو د پېښې په اړه د حقیقت موندونکي پلاوي مشر ویلي، کره شواهد شته چې دا کسان به د ایران په خاوره کې مړه شوي وي


ZhwandoonMay 11, 2020
931.jpg

4750

زه داسې افغانستان غواړم ، چې نه په کې جنګ وي نه په کې عداوت، نه په کې فقر وي نه په کې غربت ، نه په کې بدمرغي وي نه په کې جهالت ، نه په کې رزالت وي نه په کې شیطانت، نه په کې ظالم وي نه په کې مظلوم، نه په کې تعصب وي او نه هم د تعصب په نوم د چا توهین، نه په کې کینه وي نه په کې قهر او غوصه، نه په کې له منبره د تکفیر اوازې پورته کېږي او نه د ښار له واټونو د منکراتو انګازې. ملا له ښوونکي سره پوخلا وي او طالب له زده کوونکي سره، مسجد د دین د تبلیغ روزنځی وي او هوجره د کلتور، خان خپله خاني کوي او ملا خپله ملايي ، ښار د کلي مخالف نه وي او کلی د ښار.

هر افغان له بل افغان سره بشپړ برابر حقوق ولري ، د قوم ، ژبې ، مذهب ، جنس او سمت توپیر حرام وي، د ګومارنې معیار یوازې او یوازې سړیتوب او لیاقت وي . غرونه مې بېرته په شنو ونو پوښلي وي او سیندونه مې د تل لپاره له اوبو ډک وي، نه مې چا ته لاس و غځېږي او نه رانه مظلوم بېنوا لاړ شي، حیوانات او مرغان مې په خپل وطن کې له انسانانو څخه و نه ډار شي ؛ ټول خوښ او خوشاله وي او څاروي مې په شنو ورشوګانو کې سوکاله، د دایمي ثبات لپاره مې ولس د خپلو طبیعي حدودو او سرحدونو خاوند وي ؛ امو مې له اباسینه سره وصل وي ، یو دنګ ډبرین دېوال مې له خپل وطنه راتاو وي ، نه پر چا تېری وکړم او نه څوک تېري ته پرېږدم ، دین مې د پرمختګ خنډ نه شي او دنیا مې د دین د تقدس مخالفه ؛ دواړه سره غاړه غړۍ وي ، ورونه او خویندې مې سره برابر حقوق ولري ؛ پر یو مهال ډوډۍ وخوري او ښځینه د نارینه وو د لاس پاتې شونو ته کېنني، سیاستوال او ولس مې دواړه د سواد له نعمته برخمن وي، پوځ مې پر خپلو مټو ډاډمن وي ، د هېواد د بشپړ امنیت د خوندیتابه او په نړۍ کې د مظلومانو د ډاډ جوګه وي، پر ټول هېواد مې د قانون د واکمنۍ لمن خوره وي، ملي کرنسۍ مې په نړۍ کې د ارزښت وړ او د چارواکو خبره مې له وزن څخه برخمنه وي ، درې رنګه ملي بیرغ مې مو په هېواد او نړۍ کې رپانده او ملي هویت مو ځلانده وي، لنډه چې هېواد وال مو دومره سوکاله وي چې د نړۍ په هر ګوټ کې ، چې کوم ملا وعظ کوي او خپل ذهن کې د جنت ذهني انځورنه کوي ، نو زما افغانستان دې ورته د عیني انځور په توګه د مثال په ډول ور یادوي.


زه دې په ټول وطن کې یوه کوډله و نه لرم ، یو ملنګ دې یم، زه به د وطن پر هر کلي او بانډو ګرځم ، سندرغاړی به را سره وي ، پر خبرو او سندرو به بندیز نه وي، شاعر او هنر مند ته به په سپکه سترګه نه کتل کېږي ، زه به ورته د سوي بلبل په شان شعرونه لیکم ، هنر مند به ترې سندرې جوړوي ، د و طن پر ګوټ ګوټ به ګرځو ، سندرې به ویشو ، خبرې به وېشو ، مینې او شکرې به وېشو.


د خیالو همدا لړۍ مې ځان سره زمزمه کوله چې یو دم یوه درنه چاودنه وشوه ، له درانه خوبه را ویښ شوم ، په خپلو خولو کې خیشت پیشت وم ، پر ځان مې کلمه تېره کړه ، یو ځل بیا په خیال کې ډوب شوم او دا لنډۍ را په یاد شوه :
په تصور مې ځان باچا کړ
چې سر مې پورته کړ ملنګ د دنیا ومه…


ZhwandoonMay 11, 2020
926-1024x576.jpg

4200

ژباړه: رحمت الله محمد

مشهور فزیک پوه استیون هاوکینګ له مرګ نه څو ورځې وړاندې خپله وروستۍ مقاله د (د نړۍ د پای وړاندوینه) په موضوع سره نشر کړه.

توماس هرتوګ چې د دې مقالي په لیکلو کې د هاوکینګ همکار وو، د دې مقالي له اعلان وروسته وویل چې د هاوکینګ وروستۍ مقاله د ریاضي د یوه فرمول په اړه وه، په کومي کې چې د نورو جهانونو د شتون په هکله شواهد وړاندې شوي وو.

ستوري پیژندونکې دا خبره د موازي جهانونو شتون بولي. هاوکینګ په دې مقاله کې وایې چې له لویي چاودني (بیګ بنګ) وروسته ډیر جهانونه منځته راغلو، او زموږ جهان د هغوي له ډلي څخه یو ده.

هاوکینګ او همکار یې توماس هرتوګ په دې مقاله کې ویلي چې: له کلونو راهیسي فزیک پوهان په دې اړه فکر کوي چې له لویي چاودني (بیګ بنګ) وروسته زمونږ جهان څه ډول منځته راغی، خو دوي وایې چې لویي چاودني نه یوازي زمونږ بلکي نور جهانونه هم رامنځته کړي دي. هاوکینګ تاکید کول تر څو فزیک پوهان فضاء د ډیرو جهانونو لرونکې په توګه درک کړي، نو په دې موخه هغه په دې لټه کې وو تر څو خپلي دې نظريي ته یو علمي، منطقي او تضمین کوونکی چوکاټ رامنځته کړي.

که څه هم زیات ستورې پیژندونکې باور لري چې د موازي جهانونو شتون ندی اثبات شوی، خو ښاغلی هرتوګ وایې چې د هاوکینګ د موډل له مخې زمونږ جهان ته په کتو سره د نورو جهانونو شتون هم درک کولای شو.

په داسي حال کې چې د هاوکینګ د وروستۍ نظریي په هکله کوم ثبوت نشته او ستورې پیژندونکې یې هم نه تاییدوي خو هغه د دې تر څنګ یوه بله جالبه نظریه هم وړاندې کړي ده. د هغه په نظر چې د نړۍ پای به ډیر تیاره او یخ وي، ځکه چې د ستوریو انرژي به یو وخت کمیږي.

څېړونکې په دې باور وو چې ښایي هاوکینګ د خپلي وروستۍ نظريي په وسیله د نوبل جایزه تر لاسه کړي، په داسي حال کې چې هغه څو ځله د نوبل جایزي ته نوماند شوی وو، خو تر لاسه یې نکړه.

هاوکینګ له خپل مرګ نه دوه اونۍ وړاندې له هرتوګ سره ولیدل او له هغه سره یې د خپلي وروستۍ مقالي د بشپړولو او نشرولو په هکله خبرې وکړي.

هرتوګ د هاوکینګ له مرګ وروسته وویل چې هاوکینګ ته د سیاهچالو  په اړه د فضایي څېړنو او نسبیت په اړه څېړنو په خاطر باید د نوبل جایزه ورکړل شوي وای.

هاوکینګ د ۲۰۱۸م کال د مارچ میاشتي په ۱۴مه نیټه د ۷۶ کالو په عمر په کمبریج کې ومړ.



زمونږ په هکله

ژوندون وېبپاڼه د ژوندون راډيو ټلوېزيون رسمي وېبسايټ دى. لکه څنګه چې ژوندون راډيو ټلوېزيون په هېواد کې داسې يوه ازاده رسنيزه شبکه ده، چې په هېڅ سياسي جريان، ډلې ټپلې، ګوند، کيڼو او ښي سياسي ډلو او نورو جريانونو پورې تړلې نه ده. دغسې دا وېبپاڼه هم ازاده، خپلواکه او ناپېيلې ده، چې يوازې ملي، اسلامي ارزښتونه پالي او د افغانانو د ژوند د سوکالۍ لپاره هلې ځلې کوي…


مونږ سره اړیکه

0700651008