وروستي خبرونه

2020 May 6

ZhwandoonMay 6, 2020
889.jpg

2660

که څه هم ما هېڅکله نه دي غوښتي چې د ځينو مغرضو اشخاصو وړو او غټو غرضي نيوکو ته ځوابونه ورکړم، خو بيا هم ددې لپاره چې د ځينو حشراتو پر مکروبونو د ذهني روښانتيا دوا پاشي وشي او د هغو ځينې څرګند او ناڅرګند مکروب له منځه ولاړ شي، ښه ده چې څو ټکي روښانه کړم:
څو موده وړاندې شهيد عارف او څو نور ملګري کابل ته راغلي وو. ما د پښتونولۍ او افغانيت د دود له مخې دوی ته مېلمستيا وکړه او هم مې ورته په ژوندون کې د نظرياتو د اظهار په خاطر غونډه جوړه کړه. دا ډول غونډه يوازې د عارف وزير لپاره نه وه جوړه شوې، بلکې تر دې دمخه هم چې له پښتونخوا څخه هر يو ملي او فرهنګي شخصيت راغلی، هر يو ته مو مېلمستيا کړې او د هغو يادونه او نمانځنه مو کړې ده، د حسينه ګل تنها، اباسين يوسفزي، د پاچاخان، حمزه بابا، غني خان او نورو ګڼو شخصيتونو قدرداني، يادونه او نمانځنه مو کړې ده. د يوازيني رسنيز مرکز په توګه مو د پښتنو او بلوڅو د پيوستون ورځ هېڅکله له ياده نه ده ويستلې او همدارنګه په کوزه پښتونخوا کې چې هر ډول پېښه، پخوانۍ او يا حال کې پېښه شوې، موږ د هغو اړوند پروګرامونه جوړ کړي دي. هغه وخت چې د پښتون ژغورنې غورځنګ لومړنۍ مظاهرې پيل شوې، دلته يې لا چا په اړه فکر هم نه شو کولای او دا مهال يې ان د (پښتون تحفظ مومنټ) نوم هم نه وه غوره کړی چې موږ يې په ژوندون ټلوېزیون کې د تائيد په ملاتړ درنه غونډه جوړه کړه، د ولسي جرګې زړور او ژبور وکيل عبيدالله بارکزي او د وردګو د ټولنيزې سرتاسري شورا رييس ډاکتر ضياءالدين کمال په کې اورنۍ ويناوې وکړې. ورپسې متصل مو په ننګرهار کې بله لويه غونډه وکړه. کله چې د پښتون ژغورنې غورځنګ ورو ورو خپله بڼه څرګنده کړه، نو بيا مو له نورو ملګرو سره يو ځای، په کندهار، لغمان، کونړ او نورو ولايتونو کې غونډې جوړې کړې، کله چې غورځنګ عام شو، بيا مو هم د شهيد ارمان لوڼي او سره کمر د شهيدانو په باب درنې غونډې وکړې، دغه راز د پښتون ژغورنې غورځنګ اکثره غونډې مو په مستقيم او نا مستقيم ډول خپرې کړې او هم د دوی د نورو پلويانو تائيدي او ملاتړ غونډې مو هم تر خبري پوښښ لاندې راوستې او هم مو دوی په باب مستقل راپورتاژونه خپاره کړل، لنډه دا چې هېڅ رسنۍ، ګوند او ډلې د پښتون ژغورنې غورځنګ په تائيد کې دومره منظمې او متواترې غونډې نه دي جوړې کړي، لکه موږ او زموږ ملګرو چې جوړې کړې دي. په همدې خاطر خو يې ان د پاکستان د پوځ وياند اصف غفور حساسيت هم راوپاروه. په همدې بهير کې مشال خان ټکر هم کابل ته راغی، د هغه د نظريانو د اظهار لپاره مو يوه درنه غونډه جوړه کړه او ددې ترڅنګ مو د نږدې (۶ زره) مخونو په شمېر د کوزې پښتونخوا د نوموتو لیکوالو اثار چاپ کړل. زموږ مبارزه يو اوږد تسلسل لري چې يوازې پښتون ژغورنې غورځنګ سره اړه نه لري، تر هغه وړاندې هم وه، اوس هم شته او که ژوند و سبا به هم وي. په مجموعي ډول د ټولو هغو لويو وړو غونډو، يادونو، نمانځنو او خپرونو شمېر چې موږ د خپل محکوم افغانستان د ولسونو لپاره ترسره کړي، شمېر يې تر (۵۰۰) بېلابېلو کارونو اوړي. دا هغه کار دی چې چا کړی وي زور يې ورته معلومېږي. څلوېښت کاله وروسته مو په پښتونستان واټ کې د پښتونستان لوحه ولګوله چې د پښتنو او ناپښتنو ستميانو له خوا په ګڼ شمېر کنځلو بدرګه شوم. په داسې حال کې چې د اطلاعاتو او کلتور او قبايلو وزارتونو وزيران پښتانه وو، خو دا جرئت يې نه شو کولای چې دې قانوني کار او حق ته وړاندې شي. موږ دا کارونه ددې لپاره نه کوو چې چاته ځان وښيو او يا له خپل قام څخه شاباسی واخلم. ځکه زما قوم دومره مظلوم شوی چې د شاباسي وس هم په کې پاتې نه دی. خو دا به هم بې انصافي وي چې نظار شورا او د دوی کدو کرېلې تاليڅټو ته هر څه په ډاګ پرېږدو چې دوی پرې خاورې واړوي او حقيقتونو ته بل رنګ ورکړي. موږ چې د خپل فکر او قلم په زور دلته د پښتنو اصلي دښمنانو ته ماتې ورکړې، نو د هغو پاتې شوني او پرکټيان بيا د چا زامن دي؟
خبره عارف شهيد ته رالنډوم، کله چې په ژوندون کې ورته غونډه جوړه شوه، عارف وزير، اياز وزير او نورو ملګرو په کې ښې په زغرده خبرې وکړې، تر غونډې وروسته ما عارف وزير ته وويل چې خبرې ښې وې خو که دې زړه وي يو څه برخه به يې ترې وباسم، ځکه چې خطرناکې راته ښکاره شوې، هغه وويل، خبرې مې کټ نه کړې، زه چې د خپل پلار او نيکه په وطن کې په زغرده ونه غږېږم، نو بيا به چېرته وغږېږم؟ خو دې سره سره مې بيا هم د يو څو کلمو يادښت ايډيټ ته ورکړ چې دا ترې لرې کړئ، هغه مستقيماً پر ځينو هغو اشخاصو نيوکه وه چې دده دوستان هم وو.
عارف وزير ماته وويل چې دا خبرې خو زه هلته هم کوم، مخامخ يې ورته کوم، کله يې چې لاس راباندې بر شي وژني مې، دې خبرو پسې نه ګرځي. خبره تېره شوه، غونډه هم نشر شوه، بيا د جمهور رييس د لوړې مراسم وو، هلته هم ده ګډون کړی و، د غونډې په وروستيو شېبو کې څو توغندي راغلل، د غونډې شاوخوا ساحو کې ولګېدل، سخت بد اوازونه يې وکړل، عارف وزير د غونډې په اول او زه د غونډې په وروستي کتار کې ناست و، خلک داسې وترهېدل، لکه په مرغيو چې ډز وشي، هغو خلکو تر ټولو زياتې منډې ووهلې چې په رسنيو کې همېشه د جنګ د ګرمولو ترانې غږوي. دې وخت کې عارف افغان پورته شو، خلکو ته يې وويل کېنئ کېنئ پر خپل ځای کېنئ، هېڅ خبره نه ده، پنجاب موږ په دې ډزو نه شي ډارولی، دې ډزو سره موږ بلد يو، هره ورځ موږ دا ډزې اورو. دې اوزا سره خلک بېرته راټول شول، ورو فضا ارامه شوه، جمهور رييس خپلې وينا ته دوام ورکړ.
پر سبا مو سرينا هوټل کې د سوداګرۍ د اتاقونو له ملګرو سره يوځای د پښتون ژغورنې غورځنګ مشرتابه غړو او له کوزې پښتونخوا څخه نورو راغلو دوستانو ته په سرینا هوټل کې يوه درنه او پرتمینه غونډه جوړه کړه؛ له ملي ولولو او وينا ډکه يوه غونډه، هغه غونډه هم په بشپړ ډول له ژوندون څخه نشر شوه، ملګري ټول خپلو سيمو ته ورسېدل، د هر يو احوال مو واخيست. لکه څنګه چې عارف افغان وړاندوينه کړې وه، څو ورځې وروسته د پوليسو له خوا ونيول شو، بيا جېل ته يوړل شو. بيا بېرته ايله شو او تر هغه وروسته دغه ناوړه پېښه رامنځته شوه. کله چې دا پېښه رامنځته شوه نو زه او زما کورنۍ پرې دومره ځورېدلي يو چې تر علي وزير که زیات نه يو دردېدلي، نو کم خو هم نه يو دردېدلي.
خو اوس ګورم چې د نظار شورا يو شمېر پخواني تاليڅټي چې نوې نوې يې د پښتو او پښتونولۍ سريندې شروع کړي او يو شمېر نور کم معلوماته اشخاص هم ورسره يو ځای شوي او غواړي چې دې مسئلې ته داسې رنګ ورکړي چې ګنې که عارف افغان ژوندون ته نه وای راغلی، نو دی به نه شهيدېده، دوی د هغه پر شهادت خفه نه دي، خو اوس غواړي چې د هغه له سپېڅلي شهادت څخه د پښتنو د يو بل شعوري مرکز د بدنامولو لپاره يو ډول ناوړه ګټه پورته کړي، دا هغه ارمان دی چې ددې مرکز پر وړاندې يې د (ای ايس ای) سازمان او د نظار شورا ډله لري. د تېرو لسو کلونو په بهير کې زما ټوله انرژي ددې پرځای چې د ټلوېزیون پر خپرونو ولګي، پر دې مصرف شوې، چې څنګه پر دې مرکز د نظار شورا او (ای ایس ای) د بريدونو مخه ونيسم. د همدې مرکز او د هوتخېلو د درانه قوم او يو شمېر نورو شعوري مبارزينو د مبارزو برکت دی چې ښاغلی غني اوس د قدرت پر ګدۍ ناست دی. يو وخت داسې هم و چې د ډاکتر غني پر کور د لنډغرو د بريد خطر نه و، خو ژوندون ته دا خطر هر وخت محسوس و. پښتانه او په ټوله کې لر او بر افغانان اوس دوه اساسي دښمنان لري؛ تر کرښې اخوا د پاکستان (ای ايس ای) او تر کرښې دې خوا نظار شورا او د شمالټلوالې لنډغر دي. نور فرعي قوتونه او اشخاص بيا د همدې دوو عناصرو پر محور راڅرخي. دوی افغانستان کې هېڅکله قوي مرکزي نظام نه غواړي، ځکه که دلته يو قوي مرکزي نظام جوړ شي، بيا د محکوم افغانستان د ازادېدو داعيه په اسانۍ سره تعقيبېدلای شي. د پنجاب اداره ددې ګواښ له امله دلته يو سست او بې ثباته حکومت غواړي او د نظار شورا، جمعيت، ستم او نورې ډلې بيا وايي که چېرې دلته يو قوي مرکزي نظام جوړ شو، نو بيا خو موږ اوسنی شان او شوکت نه شو ترلاسه کولای او بيا خو که لر او بر افغان سره يوځای شي، نو موږ خو په درياب کې يو څاڅکی يو. نو ځکه خو دوی په هره برخه کې کرايي او اجرتي کسان ګومارلي چې د ملتپالو افغانانو پر وړاندې ذهنونه ګډوډ کړي. عجيبه پوښتنه خو داده چې د عارف وزير د شهادت لپاره ژوندون ټلوېزیون ته راتګ او خبرې پلمه کېږي او دا ورته خطر ګڼل کېږي، خو ارګ ته تګ او هلته خبرې بيا ورته د خطر زنګ نه وي؟ له دې څخه معلومېږي چې (ای ايس ای) او نظار شورا ژوندون ټلوېزيون خپل اصلي دښمن ګڼي نه ارګ او يا يې له ارګ څخه هېڅ حيا نه کېږي.
ښاغلي عبيدالله بارکزي او ډاکتر کمال هم دلته د کوزو پښتنو ملاتړ غونډه کې توندې ويناوې کړې وې، هغوی هم په بېلابېلو پېښو کې شهيدان شول، يانې که هغه هم دلته نه وای راغلي، نو نه به شهيدانېدل؟ په کوزه پښتونخوا کې د پاکستان د پوځ له خوا (۷۵ زره) پښتانه شهيدان شول، هغه ټول دلته ژوندون ته راغلي وو؟ ارمان لوڼی، طاهر داوړ او د سره کمر پښتانه چې شهيدان شول، هغوی هم ژوندون ته راغلي وو؟ که ژوندون ته راتګ او دلته خبرې (ای ايس ای) ته دومره غټ خطر وي چې د هغوی کسانو د مرګ په بيه تمامېږي چې دلته راغلي دي. نو بيا خو همدا د پښتنو د يو ستر ملي مرکز په توګه ومنئ، تخريبوئ يې ولې او ټاپې پرې ولې لګوئ.
بله خبره داده چې موږ دلته د کوم پښتون مخه نيولې چې له کوزې پښتونخوا څخه پښتانه مه رابولئ او دلته ورته غونډې مه جوړوئ؟ خو چې خپله درکې متره نه شته، د نورو د کار مخې ته ولې خنډونه جوړوئ؟
اصلي خبره داده چې زموږ شعوري مبارزه د (ای ايس ای) او نظار شورا د ګډو جاسوسانو پر زړه نه اوارېږي، له دغه مرکزه د پښتنو د مظلوميت غږ اوچتېږي، اوس غواړي په څه ډول ددې مبارزو رنګ پيکه کړي. نو ځکه مې دغه وضاحت ضرور وګاڼه. زموږ مبارزه دلته ددغو دوو وينو څښونکو او افغان ضد سازمانونو پر وړاندې روانه ده، واړه چڼي يې موږ ته کوم ارزښت نه لري، خو اوس او راتلونکي نسل ته ددې وضاحت په کار و چې موږ په ډېرو کمو امکاناتو د دغسې کړيو پر وړاندې خپلې مبارزې ته دوام ورکړی دی، نو تاسې بايد خپل دښمن ته په ډېر دقت سره متوجه اوسئ.


ZhwandoonMay 6, 2020
883.jpeg

3330

ژباړه: رحمت الله محمد

په دې وروستیو کې په ځینو ټولنیزو رسنیو کې داسي شایعات خپاره شوي چې د روان کال په وروستیو کې به د یوي بلي سیاري په هکله ډاروونکې معلومات په انټرنیټ باندې خپاره شي، دوي وایې چې د نیبیرو په نوم دا سیاره په چټکۍ سره ځمکي ته د نږدي کیدو په حال کې ده، او له ځمکي سره د ټکر په صورت کې به په ځمکه کې ژوند کولو ته د پای ټکی کیږدي. آیا دا نظریه ریښتیا کیدای شي؟

ولي خلک په ټولنیزو رسنیو کې داسي شایعات خپروي؟

د نیبیرو ټکر له ځمکې سره، له څو کلونو راهیسي هر کال د ډسامبر په میاشت کې په ټولنیزو رسنیو کې خپریږي.

په هر حال، لرغوني ساینس پوهان په دې نظر وو چې د ځمکې پای به په ۲۰۱۲م کال کې هغه مهال رامنځته شي، کله چې ځمکه له یوي بلي سیاري سره ټکر وکړي. د دوي د نظریې له مخي چې د دې ټکر په صورت کې به په ځمکه کې آتشفشانونه، زلزلې او تیز بادونه رامنځته شي، چې په پایله کې به یې په ځمکه کې ژوند پای ته ورسیږي. خو ۸ کاله کیږي چې د دې نظریي تیر شوي او ځمکه لا په خپل حال پاتي ده.

له پیړیو راهیسي انسانان فکر کوي چې ځمکه به له بلي سیاري سره د ټکر په صورت کې له منځه لاړه شي، او په دې ډول شایعاتو سره د خلکو په ذهنونو کې ویره خپروي.

امریکایي لیکوال زکریا سیچین د یوي غیري علمي نظریي له مخي وایې: د نیبیرو سیاره چې د لمریز نظام یوه بله سیاره ده، په ډیري چټکۍ سره ځمکې ته د نږدي کیدو په حال کې ده، او ژر به له ځمکې سره ټکر وکړي.

خو په حقیقت کې دا نظریي او خبرونه ټول دروغ دي، او په دې اړه هیڅ ثبوت شتون نلري، چې کومه بله سیاره دې ځمکې ته د نږدي کیدو په حال کې وي.

ناسا په دې اړه وایې:

ناسا په دې هکله وایې: که چیرته کومه سیاره ځمکې ته نږدي کیږي نو دا به په یوه ډیر عادي تلسکوپ د لیدو وړ وي. خو په کهکشانونو کې د سیارو تاریخچو ته په کتو سره ویلای شو چې له بلي سیاري سره د ځمکې د ټکر احتمال ډیر کم دی، او یا هیڅ نشته.

نو هغه څه چې په ټولنیزو رسنیو کې خپریږي په مکمل ډول دروغ دي.

د ځمکې ټکر له بلي سیاري سره، یوه افسانه ده:

که کومه سیاره ځمکې ته نږدي شي، کیدای شي هغه څو میاشتي او یا هم څو کال وړاند لا د ډیرو عادي تلسکوپونو په وسیله هم ولیدل شي، کله چې کومه سیاره د زحل تر مدار د ځمکې لورې ته رانږدي شي، نو په اسمان کې د لیدل کیدو وړتیا لري.

دا په دې معنی چې که کومه اسماني ډبره یا هم سیاره ځمکې ته د نږدي کیدو په حال کې وي، نو نه یوازي دا چې د آماتور ستورې پیژندونکې به یې وویني، بلکې هغه څوک چې یو عادي تلسکوپ هم ولري نو دا آسماني جسم به ولیدلای شي.

خو نیبیرو هغه سیاره ده چې د ستور پيژندونکو په خبره د لمریز نظام برخه نده او په هرو ۳۶۰۰ کلونو کې یو ځل د لمر په شاوخوا څرخیږي. نو د دوي په خبره چې که یادي سیاري د نورو سیارو په مدار اغیز کولای شوای، نو میلیاردونه کاله وړاندې به لا دا پېښه رامنځته شوي وای.

د نهمي سیاري شتون:

ساینس پوهان وایې چې تر دې مهاله په لمریز نظام کې نهمه سیاره نده کشف شوي، خو که نیبیرو د لمریز نظام نهمه سیاره وي، نو بیا به د دې سیاري مدار له لمر څخه د نپتون تر مدار ۴-۵ برابره لوی وي، نو دا سیاره به له ځمکې څخه تر نورو سیارو ډیره لري وي او د ځمکې مدار ته به هیڅ تاوان ونه شي رسولای.

نو په دې اړه هیڅ ثبوت شتون نلري چې کومه سیاره یا آسماني ډبره دي ځمکې ته نږدي شي، د تایید شویو راپورونو له مخي به ځمکې ته په ۲۰۷۹م کال کې یو آسماني کاڼی را نږدي شي او ۰.۰۱ سلنه امکان لري چې له ځمکې سره ټکر وکړي.

دا شایعات زیاتره وخت په ټولنیزو رسنیو کې د بیلابیلو موخو لپاره خپریږي، چې هيڅ حقیقت نلري او فقط د خلکو د ویرې سبب کیږي.


ZhwandoonMay 6, 2020
880.jpg

820

د عامې روغتیا وزارت مسوولین وايي، په تېر یوه شپه – ورځ کې په بېلابېلو لابراتوارونو کې د مشکوکو سمپلونو د ازمایلو څخه وروسته 168 مثبتې پېښې ثبت شوي، چې په دې سره هېواد کې پر کرونا ویروس د اخته کسانو شمېر 3392 تنو ته رسیږي. د دوی په خبره تېرو څلورویشتو ساعتونو کې نورو 9 تنو هم خپل ژوند له لاسه ورکړی، چې مړو شویو کسانو ټوله شمېر 104 تنو ته رسیږي.

دغه راز له یاد ویروسه تر اوسه 358 تنو نورو بیا روغون موندلی. د عامې روغتیا وزارت له خلکو غوښتي، چې کورونا جدي وګڼي او د مخنیوي په برخه کې دې د روغتیاپالانو سپارښتنې عملي کړي.


ZhwandoonMay 6, 2020
879.jpg

670

د تازه راپورنو له مخې د تاجکستان ولسمشر امام علی رحمان ویلي، د روغتیا وزیر نسیم عالم ‌زاده ته بله دنده سپاري او پر ځای یې جمال‌الدین عبدالزاده ټاکي.

د تاجکستان ولسمشر پنځه ورځې وروسته تر دې د روغتیا وزیر له دندې ګوښه کړی، چې په دغهَ هېواد کې د کورونا ویروس لومړۍ مثبتې پېښې رسماً ثبت شوې. د تاجکستان د روغتیا وزارت د مالوماتو له مخې دغه هېواد تر دې دمه د کورونا ویروس له امله پنځو تنو خپل ژوند له لاسه ورکړی او نږدې 3 سوه کسان پرې اخته دي. بلخوا بیا د ایران د عامې روغتیا وزارت ویلي، چې په تېره یوه شپه ــــــ ورځ کې د کورونا وبا له امله 63 تنو خپل ژوند له لاسه ورکړی او له 13 سوه نه ډېرې تازه پېښې ثبت شوي. ایران کې تر دې دمه نږدې لس زره کسان پر کورونا ویروس اخته شوي او نږدې 6 نیم زرو کسانو خپل ژوند له لاسه ورکړی.


ZhwandoonMay 6, 2020
878.jpg

800

د روسیې رسنیو د راپورونو له مخې د دغه هېواد دفاع وزارت غواړي د هغو کسانو سره د مرستې او مراقبت لپاره 16 صحرایې روغتونونه جوړ کړي، چې پر کوېډ 19 ناروغۍ اخته دي. تر دې وړاندې دغه وزرات 6 نور صحرایي روغتونونه هم جوړ او ګټې اخیستنې ته سپارلي، چې په کې نږدې 2 سوه زرو پورې روغتیایې پرسونل په دندو بوخت دي او دغه روغتونونه پر پرمختللو وسایلو سمبال دي.

د روسیې ولسمشر ویلي، د کورونا ویروس سره د مبارزې لپاره که اړتیا پیدا شي له دفاعې بودیجې هم ګټه پورته کېدای شي. روسیه کې کورونا وبا په چټکۍ سره د پراختیا په حال کې ده، چې په تېره یوه شپه ـــ ورځ کې 76 کسانو خپل ژوند له لاسه ورکړی او له لس زرو نه ډېرې تازه پېښې په کې هم ثبت شوي دي.


ZhwandoonMay 6, 2020
877.jpg

790

له دغه وزارت نه په خپره شوې خبر پاڼه کې راغلي، چې د امنیه قومندانۍ د منسوبینو له لورې د دریمې ناحیې په اړوند کارت سخي سیمه کې درې تنه د وسایطو د غلا په تور نیول شوي. د خبر پاڼې له مخې چې د نیول شویو کسانو په ډله کې یوه ښځه هم شامله ده او له دغې ډلې یو عراده موټر هم د پولیسو لاس ته ورغلی دی. خبر پاڼه کاږي چې د امنیه قومندانۍ د مسوبینو له لورې د کابل په بګرامي ولسوالۍ کې هم د یولړ عملیاتو په ترڅ کې دوه تنه د قتل په تور نیول شوي.


ZhwandoonMay 6, 2020
876.jpg

910

د ننګرهار د والي ویاند عطاالله خوګياڼی وايي، چې د تورخم دروازه د چهارشنبې له سهار خلاصه او د شپې تر ۹ بجو پورې به د مسافرو په وړاندې خلاصه وي، خو د افغانستان له طرفه پاکستان ته تلونکو مسافرو ته اجازه نه ورکول کیږي.

بل لور ته په پاکستان کې افغان سفیر شکرالله عاطف مشعل ویلي، چې د پاکستان حکومت سره د ګډ تفاهم له مخې یې د تورخم لاره د څو ساعتونو لپاره د مسافرو پرمخ پرانیسته نوموړي هیله څرګنده کړې چې له دې فرصت به ټول مسافرین ګټه واخلي، او ستونزې به یې حل شي وروسته له هغې چې د کورنا ویروس د مخنیوي په موخه د تورخم دروازه د هر ډول تګ ـ راتګ پر مخ وتړل شوه، په زرګونه افغان مسافر له کرښې اخوا بند پاتي شول چې له دې وړاندې هم دافغان حکومت په غوښتنه یو ځل د تورخم دروازه پرانستل شوه چې زرګونه افغان مسافر هېواد ته راستانه شول


ZhwandoonMay 6, 2020
874.jpg

1700

ایرو ایشیا د افغان سولې او په هغه کې د پاکستان د اغېز په اړه یوه لیکنه خپره کړې او ویلي یې دي، چې پاکستان غواړي څو افغانستان کې یو کمزوری او لاسپوڅی حکومت رامنځته شي څو د دغه هېواد د کنټرول لاندې وي.

د خبر پاڼې په وینا دغه هېواد د مجاهدینو له حکومت څخه راوروسته په دې لټه کې دی، څو په سیمه کې د هند پر وړاندې ځان پیاوړی کړي او افغانستان په خپله ولکه کې وساتي. د ایروایشیا په وینا چې پاکستان اوس هم د افغان سولې په پروسه کې خپلې ګټې لټوي څو په افغانستان کې د دوی پر خوښه حکومت جوړ شي


ZhwandoonMay 6, 2020
873.jpg

1380

د جان هاپکینز پوهنتون د مالومات له مخې تر دې دمه نړۍ کې د کورونا وبا له امله له 2 لکو او 57 زرو نه ډېرو کسانو خپل ژوند له لاسه ورکړی او له دری نیم میلیون نه ډېر کسان پرې اخته دي چې تر ټولو زیات یې امریکا کې دي. د جان هاپکینز پوهنتون د مالوماتو له مخې چې دغه هېواد کې تر دې دمه له 71 زرو نه ډېر کسان مړه شوي او له یو میلیون،2 لکو نه ډېر کسان پرې اخته دي، تر امریکا وروسته هسپانیا، ایټالیا او برېتانیا تر ټولو ډېرې مثبتې پېښې لري.

همدا راز د مړینې شمېره هم تر امریکا وروسته په برېټانیا کې تر ټولو لوړه ده. په برېټانیا کې تر دې دمه 29427، په ایټالیا کې 29318، په هسپانیه کې 25613، په فرانسه کې بیا 25531 کسان د کرونا له امله مړه شوي دي.


ZhwandoonMay 6, 2020
872.png

850

پخواني ولسمشر حامد کرزي په یوې خپره کړې خبر پاڼه کې ویلي، چې جګړه دې نوره پای ته ورسول شي او یو سراسري اوربند دې وشي، په وینا یې هېواد کې روانه جګړه د افغانانو په زیان او د پردیو په ګټه ده. حامد کرزي په اوسني روان وضعیت اندېښنه ښودلې او دغه وضعیت یې د سولې له رانو هڅو سره په ټکر کې بللی.

نوموړي له په ښکېلو غاړو غږ کړی چې افغان وژنه دې نوره ودرول شي او ژر تر ژره دې خپلمنځي خبرو لار غوره شي، څو هېواد کې یوه تل پاتي سوله رامنځته شي. پخوانی ولسمشر حامد کرزی په داسې مهال یادې څرکندونې کوي، چې دې ورستیو کې د دواړو لوریو ترمنځ جګړې زور اخیستی او یو بل ته د درنې مرګ ـ ژوبلې اړولو ادعاوې کوي


ZhwandoonMay 6, 2020
870.jpg

1290

ژباړه: رحمت الله محمد

په راتلونکې کې به زراعتي کارونه زیاتره د اتوماتو ماشینونو، ډرون او روباټونو په وسیله تر سره کیږي. ځکه ویل کیږي چې په زیاتره هېوادونو کې د موجودو بزګرانو عمرونه په لوړیدو دي او ځوانان د بزګري کارونو ته زړه نه ښه کوي.

د نړۍ ټول نفوس خوراکې توکو ته آړتیا لري چې دا اړتیاوې یې زیاتره له نباتاتو څخه لاسته راځي، او دا کار د بزګرانو له لورې تر سره کيږي، خو د دې لپاره چې زراعتي کارونه په راتلونکې کې لا ښه او چټک شي نو ساینس پوهانو په دې برخه کې د روباټونو او اتوماتو ماشینونو جوړولو ته مخه کړي ده.

نیمه اتومات ماشینونه لا مخکې په زیاترو هېوادونو کې د ګټي اخیستني وړ وو، خو داسي ویل کېږي چې په نږدي راتلونکې کې به بشپړ اتومات ماشینونه هم بازار ته وړاندې شي. د دغو آلاتو جوړونکو شرکتونو څخه یو یې هم د سي ان اچ انډسټریل شرکت ده، چې په دې برخه کې يې بېلابېل اتومات وسایل رامنځته کړي دي، چې د هغوي له ډلي یو اتومات تراکتور تازه په بریتانیا کې په عملي ډول کارولی دی. دا تراکتور چې نوم یې کیس اې ایس ایښودل شوی دی، په بشپړ ډول اتومات دی، او حتا په دې تراکتور کې د بزګر د کیناستو ځای هم نشته.

دا تراکتور د پروګرام کیدو وړتیا لري او له هغه وروسته یو بزګر کولای شي دې تراکتور ته کارونه د آپلیکیشن له لارې وښيې. له دې ډول وسایلو څخه په بریتانیا، استرالیا او امریکا کې زیاته ګټه اخیستل کیږي.



زمونږ په هکله

ژوندون وېبپاڼه د ژوندون راډيو ټلوېزيون رسمي وېبسايټ دى. لکه څنګه چې ژوندون راډيو ټلوېزيون په هېواد کې داسې يوه ازاده رسنيزه شبکه ده، چې په هېڅ سياسي جريان، ډلې ټپلې، ګوند، کيڼو او ښي سياسي ډلو او نورو جريانونو پورې تړلې نه ده. دغسې دا وېبپاڼه هم ازاده، خپلواکه او ناپېيلې ده، چې يوازې ملي، اسلامي ارزښتونه پالي او د افغانانو د ژوند د سوکالۍ لپاره هلې ځلې کوي…


مونږ سره اړیکه

0700651008