Zhwandoon.tv ښه راغلاست

د کندوز په شېرخان بندر ګمرک کې د تېر حکومت پرمهال په بېلابېلو جرمونو نيول شوي وسایط بېرته مالکانو ته سپارل کېږي.

 د شېرخان بندر ګمرک په ګودامونو کې شاوخوا درې سوه شخصي او دولتي هغه وسایط له کلونو راهېسې ولاړ دي، چې په کې قاچاق، وسلې او مخدره توکي نیول شوي وو.

په دغه بندر کې د کمېسیون مسؤلین وایي، هر څوک چې دلته موټر ولري او کره اسناد وړاندې کړي د ضمانت پر اساس به ورته موټر تسلیم کړي .

همدا تېره ورځ ددغه موټرو د تسلیمۍ لړۍ پيل شوه .

پوره څلور کاله وروسته دغه قولفونه د اسلامي امارت  له لوري د کمېسيون پر موجودیت کې خلاص شول، چې خلکو ته خپل وسایط ور تسلیم کړي .

تېره ورځ طالبانو خلکو ته اعلان کړی وو چې د اسنادو او ضمانتونو درلودو سره هر څوک کولای شي چې خپل موټر له دغه ګودامونو څخه وباسي .

د اسلامي امارت لخوا د ټاکل شوي کمېسيون غړي مولوي رحمان الدین حذیفه ټولو هغه کسانو ته ډاډ ورکوي چې دلته یې موټرونه تم پاتې دي، خو وایي د تسلیمېدو پرمهال باید کره اسناد او ضمانت له ځان سره ولري .

خلک چې له کلونو راهېسې یې موټرونه په دغه ګودامونو کې تم پاتې وو، وایي د تېر حکومت پرمهال ترې دومره پيسې غوښتل کېدې چې د موټرو له بیو پورته وې، خو د اسلامي امارت له خوا ورته پرته له خنډ او ځنډ موټرونه ور تسلیم شول .

ددې وسایطو تر څنګ  یو بایسکل هم ګمرک ته سپارل شوی چې ویل کېږي د یوه ښوونکي و او د چاودنې په ځای کې نیول شوی و. ددغه ګودام مامورین وایي تېر حکومت له دغه ښوونکي د رشوت غوښتنه در لوده ترڅو بایسکل ورته خوشې کړي، خوهغه مالي توان نه درلود او تر اوسه یې بایسکل تم پاتې دی . اوس طالبان هڅه کوي دغه ښوونکی پيدا او بایسکل ورته پرته له کوم خنډ او ځنډ ور تسلیم کړي.

افغانستان

نړۍ